粵語音素考察

粵語計埋零聲母總共有20個聲母，唔計「唔」同埋「五」有 54個韻母。屈指一算，如果我要將每粒制map去一個音素，真係分分鐘兩個鍵盤都唔夠使。

所以我將粵語拼音系統拆成三組，分「聲母」、「韻腹」、「韻尾」，令所有嘅字都可以係化成呢35個元素入面嘅組合：（例如「粵」字 (jyut6) 根據呢個表可以拆做 [j]+[yu]+[t]）

聲母	韻腹	韻尾
b /p/	aa /aː/ (A)	-i /~i/ 同埋 /~y/ (y)
p /pʰ/	a /ɐ/	-u /~u/ (U)
m /m/	e /ɛː/ 同埋 /e/	-m /~m/ (M)
f /f/	i /iː/ 同埋 /ɪ/	-n /~n/ (N)
d /t/	o /ɔː/ 同埋 /o/	-ng /~ŋ/ (X)
t /tʰ/	u /uː/ 同埋 /ʊ/	-p /~p̚/ (P)
n /n/	oe/eo /œː/ 同埋 /ɵ/ (O)*	-t /~t̚/ (T)
l /l/	yu /yː/ (v)	-k /~k̚/ (K)
g /k/
k /kʰ/
h /h/
ng /ŋ/ (x)
z /t͡s/
c /t͡sʰ/
s /s/
gw /kʷ/ (q)
kw /kʷʰ/ (Q)
j /j/
w /w/

註1：括弧內嘅英文字係我定義嘅程式內碼。如果睇唔明我啲code可以翻嚟查表。

註2: 上表「韻腹」同埋「韻尾」嘅分類只係我憑直覺亂寫，語言學上[-i]同埋[-u]唔當韻尾。

註3: 我將oe同埋eo組合埋一切係因爲(i)兩個都似'er'聲，好多香港人根本唔識分（有啲拼音會直情將兩個音都用'eu'表示)，(ii)兩個韻嘅韻尾組合冇重複（例如-t只能對eo,-k只能對oe)。（粵拼2018修訂好似有收/oet/嚟表示「oet4 氣」(官話：打嗝），但呢個音只係用於擬聲，對輸入法影響唔大。）

註4: 我初步諗住將所有韻尾自動map去[a]呢個韻腹度，因爲[a]音傳統上一定要有韻尾先可以成音。參考普通話拼寫規則，聲母[j]同埋韻腹[i]可以合做一粒制，[w]同埋[u]都係一樣（甚至連kw同埋gw中嘅w都可以用埋呢粒制)。[yu]亦會預設聲母[j]，其餘嘅韻因爲有零聲母，所以就唔特別處理。

下一步可以將上表再簡化，將一啲無可能同時出現嘅聲符map埋一粒制度。目標係homerow+spacebar+食指、中指、無名指活動範圍內嗰幾粒制可以打得出所有組合。