本方案字形選用原則

單字

本碼表單字音預設收錄所有傳統漢字及其異體字，唔收錄大陸簡化字字形。亦即係話，我哋嘅單字會收錄「爲」同「為」、「溼」同「濕」，但係唔會收錄「为」、「湿」。

詞組

詞條部分，本碼表所有詞條均只收錄 OpenCC 傳統漢字字形。即係話，我哋嘅碼表詞條只會收錄「因爲」，唔會有「因為」。

注意

呢度有一個例外，就係對於部分專有名詞，我哋遵循「名從主人」同習慣嘅原則。例如 OpenCC 標準同香港標準均爲「線」，但係港鐵用「綫」，所以我哋嘅詞表入邊港鐵嘅路線名均用「綫」。

原因

我哋噉樣收錄，係因爲 OpenCC 嘅傳統漢字字形「從分不從合」，相比於臺灣同香港字形儲存咗更多信息。所以只要保留一份 OpenCC 標準字形，就可以用 OpenCC 自動轉換到臺灣、香港、大陸、日本等唔同地區嘅字形。